ბაზისბანკის მიერ დეველოპერული და სამშენებლო სექტორის მხარდაჭერის ფარგლებში, ეკო გარდენი ქუთაისში მყუდრო საცხოვრებელ კომპლექსს აშენებს. პროექტის ჯამური ღირებულება 1.7 მილიონი აშშ დოლარია, ბანკის მიერ გაწეული ფინანსური მხარდაჭერა კი 500,000 აშშ დოლარს შეადგენს.

პროექტი ბუხაიძის ქ. 11-ში მდებარეობს, რომელიც მყუდრო, წყნარ საცხოვრებელ სივრცეს ქმნის და მოიცავს უსაფრთხო გარემოში მდებარე 10 სართულიან კომპლექსს ორდონიანი საპარკინგე სივრცით, კეთილმოწყობილ ინფრასტრუქტურას გამწვანებული ეზოთი და საბავშვო გასართობი კუთხით.

პროექტის სამშენებლო სამუშაოები დაწყებულია და ამ ეტაპზე 7 სართულია აშენებული. კომპლექსის მშენებლობა ითვალისწინებს ენერგო ეფექტური სამშენებლო მასალების გამოყენებას, რაც თბო და ხმის იზოლაციას უზრუნველყოფს. ეკო გარდენს საკუთარი ბეტონის საწარმო აქვს. კომპანია თავად უზრუნველყოფს უმაღლესი ხარისხის ბეტონის წარმოებას და მშენებლობის  ლაბორატორიულ შემოწმებას. კომპლექსის მშენებლობა  2024 წელს სრულდება.

"ეკო გარდენი 2019 წლიდან ოპერირებს ქართულ ბაზარზე და ამ დროის განმავლობაში მოვიპოვეთ სტაბილური, სანდო კომპანიის რეპუტაცია, რომელიც უზრუნველყოფს მაღალი ხარისხის მშენებლობას. კომფორტული ინფრასტრუქტურა, ბინების გონივრული გეგმარება, მაღალი ხარისხის სამშენებლო მასალა და მაღალკვალიფიციური საპროექტო-საინჟინრო გუნდი გამოგვარჩევს ქართულ ბაზარზე. ბაზისბანკთან პარტნიორობით, სამომავლოდ კიდევ მეტ პროექტს განვახორციელებთ ჩვენი მობინადრეების „მშვიდი ცხოვრებისთვის“ და შევუწყობთ ხელს რეგიონში სამშენებლო სექტორის გაძლიერებას“, - აცხადებს ეკო გარდენის დირექტორი, გაგა  ჩხეიძე.

„ბაზისბანკის ერთ-ერთ პრიორიტეტულ მიმართულებას დეველოპერული სექტორის მხარდაჭერა წარმოადგენს. მსგავსი პროექტების განხორციელება მნიშვნელოვანია ქვეყანაში სამშენებლო სექტორის განვითარებასა და ეკონომიკის გაძლიერების მიმართულებით. მოხარული ვარ, რომ ჩვენთან პარტნიორობით, იმერეთის რეგიონში კიდევ ერთი წარმატებული პროექტი ხორციელდება, რომელიც დადებითად აისახება ზოგადად ბიზნეს გარემოზე“, - ამბობს ბაზისბანკის კომერციული დირექტორი, გიგი გაბუნია.