შინაგან საქმეთა სამინისტროს თანამშრომლებმა, ბოლო პერიოდში ჩატარებული ოპერატიული ღონისძიებებისა და საგამოძიებო მოქმედებების შედეგად, თბილისსა და საქართველოს რეგიონებში უკანონო ცეცხლსასროლი იარაღები და საბრძოლო მასალა ამოიღეს. დაკავებულია 9 პირი. დანაშაული 7 წლამდე ვადით თავისუფლების აღკვეთას ითვალისწინებს.

თბილისის პოლიციის დეპარტამენტის, დიდუბე-ჩუღურეთის მთავარი სამმართველოს თანამშრომლებმა 1988 წელს დაბადებული, წარსულში ნასამართლევი ი.ნ. დააკავეს. სამართალდამცველებმა მისი საცხოვრებელი სახლის ჩხრეკისას პისტოლეტი, მჭიდი და 12 ვაზნა ნივთმტკიცებად ამოიღეს.

კახეთის პოლიციის დეპარტამენტის საგამოძიებო სამმართველოს თანამშრომლებმა, ლაგოდეხის, ყვარლის, დედოფლისწყაროსა და საგარეჯოს რაიონული სამმართველოების თანამშრომლებთან ერთად, სხვადასხვა დროს ჩატარებული ოპერატიული ღონისძიებებისა და საგამოძიებო მოქმედებების შედეგად 4 პირი დააკავეს: 1989 წელს დაბადებული, წარსულში ნასამართლევი დ.ბ., 1979 წელს დაბადებული ზ.მ., 1974 წელს დაბადებული დ.შ. და 1973 წელს დაბადებული ე.ვ. მათი საცხოვრებელი სახლების ჩხრეკის შედეგად ამოღებულ იქნა: 3 ცეცხლსასროლი პისტოლეტი, ავტომატური ცეცხლსასროლი იარაღი, გადაჭრილი სანადირო თოფი, 4 მჭიდი, 77 ვაზნა და 1 ხელყუმბარა.

აჭარის პოლიციის დეპარტამენტის თანამშრომლებმა 1976 წელს დაბადებული უცხო ქვეყნის მოქალაქე ა.ო.-ს პირადი და დროებითი საცხოვრებელი სახლის ჩხრეკის შედეგად ცეცხლსასროლი პისტოლეტი, 41 ვაზნა და მჭიდი ამოიღეს. ამავე დეპარტამენტის თანამშრომლებმა ასევე დააკავეს 1972 წელს დაბადებული ო.ე., რომლის პირადი ჩხრეკის დროსაც ცეცხლსასროლი იარაღი, 15 ვაზნა და მჭიდი აღმოჩნდა.

დაკავებულები არიან ასევე 2001 წელს დაბადებული უცხო ქვეყნის მოქალაქე დ.ჰ. მარნეულის რაიონიდან, რომლის დროებითი საცხოვრებელი სახლის ჩხრეკის შედეგად ამოიღეს ცეცხლსასროლი იარაღი, 10 ვაზნა და მჭიდი.

შიდა ქართლის პოლიციის დეპარტამენტის დეტექტივების სამმართველოს თანამშრომლებმა 1984 წელს დაბადებული გ.ა. დააკავეს. მისი პირადი ჩხრეკის დროს პოლიციამ ცეცხლსასროლი პისტოლეტი, მჭიდი და 15 ვაზნა ამოიღო.

ცეცხლსასროლი იარაღისა და საბრძოლო მასალის უკანონო შეძენა-შენახვისა და ტარების ფაქტებზე გამოძიება საქართველოს სისხლის სამართლის კოდექსის 236-ე მუხლის მე-3 და მე-4 ნაწილებით მიმდინარეობს.