„ქრონიკა პლუსის“ დამფუძნებელ ელისო კილაძეს, - რომელიც დღეს დილას დააკავეს, - ედავებიან ყოფილ გენერალურ პროკურორ ოთარ ფარცხალაძესა და ბიზნესმენ ძმებ დავით და გიორგი მიქაძეებთან ერთად თაღლითობასა და ფულის გათეთრებას. ბრალდება „ქოლცენტრებს“ უკავშირდება.

პროკურატურაში დღეს დილას გამართულ ბრიფინგზე პროკურორმა მიხეილ სადრაძემ განაცხადა, რომ საგამოძიებო უწყებამ „დანაშაულებრივი ქოლცენტრების მასშტაბური საქმე გამოავლინა“.

„ორგანიზებული დანაშაულებრივი ჯგუფის მიერ თაღლითობის და ფულის გათეთრების ბრალდებით სისხლისსამართლებრივი დევნა დაიწყო ათი პირის მიმართ“, - თქვა მან.

პროკურატურის თანახმად, ბრალდებულები 2020-23 წლებში 9,5 მილიონი აშშ დოლარის ღირებულების კრიპტოვალუტას დაეუფლნენ - თუმცა არ არის დაზუსტებული, კონკრეტულად ვის რა მოცულობის თანხის გათეთრებას თუ თაღლითობით შოვნას ედავებიან.

მორიგი ბრალდება ფარცხალაძესა და მიქაძეებს

ბრალი დაუსწრებლად წარედგინებათ:

• ყოფილ გენერალურ პროკურორ ოთარ ფარცხალაძეს, - რომლისთვისაც აშშ-სა და დიდ ბრიტანეთს აქვთ ფინანსური სანქციები დაწესებული;
• მის გარემოცვას - დავით მიქაძეს, ირაკლი სეხნიაშვილსა და მიხეილ ჩოხელს.

ოთხივე მათგანი მიმალვაშია - სავარაუდოდ, საზღვარგარეთ.

„ორგანიზებული ჯგუფის წევრი“ - პროკურატურა კილაძეზე

„ამავე ["ქოლცენტრების" - რ.თ.] სისხლის სამართლის საქმეზე დაკავებულია ორგანიზებული დანაშაულებრივი ჯგუფის წევრი, ელისო კილაძე“, - განაცხადა პროკურორმა მიხეილ სადრაძემ.

დაკავების შემდეგ გავრცელდა ელისო კილაძის ხელნაწერი, წერილი, სადაც იგი ბრალდებას მოგონილს უწოდებს და თავის ჟურნალისტურ საქმიანობას უკავშირებს.

კილაძე: „ცხადია, ბრალს არ ვაღიარებ“

„რაც შეეხება ბრალს, ცხადია, არ ვაღიარებ“, - წერია კილაძის მიერ მედიის წარმომადგენლებისთვის ადვოკატის საშუალებით გაგზავნილ წერილში.

„ბრალი მედება [თავდაცვის ყოფილი მინისტრის, დავით] კეზერაშვილის ქოლცენტრების მხილებაში, კონკურენტებს ანადგურებსო“, - ასეთია კილაძის ინტერპრეტაცია ბრალდებასთან დაკავშირებით.

კილაძე ასევე წერს, რომ „ლევან ჯანგველაძის მკვლელობის საქმე ჩამოიშალა“ და მან „ყველა შეკერილი ბრალი ამხილა“, რის გამოც „საჭირო ახალი ბრალი, რათა საზოგადოებამ ვერ გაიგოს სიმართლე“.

„ოთარ ფარცხალაძეს არ ვიცნობ, არც მიშა ჩოხელს. გიორგი მიქაძე პროცესზე გავიცანი, დავით მიქაძის მეგობრობა აღიარებული მაქვს“, - წერს კილაძე.

„არანაირი დანაშაულებრივი ჯგუფი არ არსებობდა, არც შენობაში ქოლცენტრების არსებობა ვიცოდი“, - აცხადებს იგი.

ფარცხალაძის მორიგი სავარაუდო დანაშაული

ეს არ არის პირველი ბრალდება, რომელიც ოფიციალურად აქვს წაყენებული ოთარ ფარცხალაძეს.

აშშ-ისა და ბრიტანეთის მიერ სანქცირებულ ყოფილ გენერალურ პროკურორს „კანონიერი ქურდის“, მერაბ ჯანგველაძის ძმის, ბიზნესმენ ლევან ჯანგველაძის მკვლელობის ორგანიზებას/შეკვეთას ედავებიან.

მისთვის დაუსწრებლად აქვთ „წინასწარი პატიმრობა“ მისჯილი და მასზე ძებნაა გამოცხადებული.

ოფიციალური ბრალის მიღმა, ფარცხალაძე ფიგურირებს რამდენიმე ეპიზოდში, რომლებშიც სავარაუდო კანონდარღვევის ნიშნები იკვეთება, მათ შორისაა: ყოფილი გენერალური აუდიტორის ცემა, სპორტის ყოფილი მინისტრის „სარდაფში ჩაყვანა“ და ა.შ..