პარლამენტის პრესსამსახურის მიერ გავრცელებული ინფორმაციით, „ლატარიების, აზარტული და მომგებიანი თამაშობების მოწყობის შესახებ“ საქართველოს კანონში ცვლილების შეტანის თაობაზე კანონპროექტს, პარლამენტმა მეორე მოსმენით, 82 ხმით დაუჭირა მხარი.

ამავე პროექტის ერთ-ერთი ავტორის, დავით სონღულაშვილის განცხადებით, აღნიშნული კანონპროექტის მიღება თითოეული პარლამენტარის პასუხისმგებლობაა.

მისივე თქმით, იგი დარწმუნებულია, რომ პროექტი, რომელიც საქართველოს კანონდებლობაში აზარტულ და მომგებიან თამაშებზე ცენზის დადებას გულისხმობს, ამავე პრობლემასთან ბრძოლაში ერთ-ერთი გარდამტეხი საშუალება იქნება.

„კანონპროექტის მიზანია, რომ მაქსიმალურად შეეზღუდოს წვდომა იმ რისკ ჯგუფებს და იმ სეგმენტს, რომელიც არის ძალიან მოწყვლადი და არ მოხდეს წახალისება ამ სექტორის და ამ ბიზნესის. ძალიან მიკვირს, როდესაც უნდათ ამ საკითხის პოლიტიკურ ჭრილში გადატანა. იმისთვის, რომ ტელევიზიების ინტერესი ყოფილიყო გათვალისწინებული, შევეცადეთ მაქსიმალურად მიგვეცა ის მოცემულობა და ის დრო, რომელიც გარემოებებიდან გამომდინარე შესაძლებელი იყო. ჩვენი მხრიდან, ამ საკითხთან მიმართებით, მაქსიმალურად გავითვალისწინეთ ყველა შესაძლებლობა. დარწმუნებული ვარ, ის რიტორიკა, რომლითაც უნდათ კანონპროექტი დააზიანონ და საზოგადოებრივი აზრი შეცვალონ, ვერ მოხდება, რადგან თითოეული ჩვენგანის პასუხისმგებლობაა ამ კანონპროექტის მიღება და დარწმუნებული ვარ, რომ ეს კანონპროექტი იქნება ერთ-ერთი გარდამტეხი ამ პრობლემასთან ბრძოლაში“, - განაცხადა დავით სონღულაშვილმა.

შეგახსნებთ, რომ პროექტი, აზარტულ თამაშებზე დამოკიდებული პირის და აკრძალული პირის ცნების განსაზღვრას, ასევე, მოთამაშის 25 წლამდე ასაკის აწევასაც ითვალისწინებს.