მე ვერ მივიღებ ვერცერთ განცხადებას სასამართლოში კორუფციის არსებობის თაობაზე, - ამის შესახებ უზენაესი სასამართლოსა და იუსტიციის უმაღლესი საბჭოს თავმჯდომარემ, ნინო ქადაგიძემ აშშ-ის სახელწმიფო დეპარტამენტის მიერ 4 ქართველი მოსამართლის დასანქცირებასთან დაკავშირებით განაცხადა. 

როგორც ქადაგიძემ პრემიერ-მინისტრ ირაკლი ღარიბაშვილთან შეხვედრის შემდეგ, უზენაეს სასამართლოში გამართულ საგანგებო ბრიფინგზე აღნიშნა, უნდა შემუშვდეს ნორმატიული ჩარჩო, რომელიც სასამართლოში რამე ფორმით ჩარევას გამორიცხავს.

"ძალიან სამწუხაროა, რომ მაღალმა პოლიტიკურმა ვნებებმა გადმოინაცვლოს სასამართლოში.
არცერთხელ, არცერთ ეტაპზე ისეთი რეალური, ნამდვილი, ხელშესახები მიღწევა არ ყოფილა, როგორიც იყო კორუფციისგან თავისუფალი სასამართლო სისტემა, შესაბამისად, მე ვერ მივიღებ ვერცერთ განცხადებას სასამართლოში კორუფციის არსებობის თაობაზე. ვიქნები თითოეული ჩვენი მოსამართლის ხელშეუხებლობის და თავისუფლების გარანტი.

მე ჩვენს პარტნიორებთან, მეგობრებთან ყოველთვის ვინარჩუნებდი განსაკუთრებულ დამოკიდებულებას, ყოველთვის ვიყავი ფრთხილი, მოზომილი მათთან ურთიერთობაში. მე ვთვლი, რომ დღეს დადგა ის მომენტი, როდესაც მე ვითხოვ უკუგებას მათგან, ამიტომ შეცდომა შეიძლება ყველას მოუვიდეს, შეცდომისგან არავინ არის დაზღვეული, უნდა ჩაერიოს რიგ საკითხებში, ყოველ შემთხვევაში, ვთვლი, რომ გარკვეულ სწორ ხედვებზე დაფუძნებული ნორმატიული ჩარჩო შეიძლება იქნეს შემუშავებული, რომელიც, ფაქტობრივად, გამორიცხავს სასამართლოში რამე ფორმით ჩარევას, აგრეთვე, მინიმუმამდე დაიყვანს სასამართლოში პოლიტიკის გავლენას", - განაცხადა ნინო ქადაგიძემ. 

შეგახსენებთ, რომ დღეს, 10 აპრილს საქართველოს პრემიერ-მინისტრსა და იუსტიციის უმაღლესი საბჭოს წევრებს შორის შეხვედრა გაიმართა.

5 აპრილს აშშ-ის სახელმწიფო დეპარტამენტმა მოსამართლე მიხეილ ჩინჩალაძე, ლევან მურუსიძე, ირაკლი შენგელია და ვალერიან ცერცვაძე კორუფციის გამო დაასანქცირა.

სანქცია ითვალისწინებს აღნიშნული პირებისა და მათი უშუალო ოჯახის წევრების მიმართ აშშ-ში შესვლის აკრძალვას.