სამუშაო მაგიდასთან გავაგრძელოთ შეთანხმებები და ყველა ის პროცესი, რაც აუცილებელია ამ იშვიათი დაავადებების მკურნალობის და მეთოდების ქვეყანაში დასანერგად,- ასე მიმართა ჯანდაცვის მინისტრმა, ზურაბ აზარაშვილმა აქონდროპლაზიის სინდრომის მქონე ბავშვების მშობლებს.

მინისტრის თქმით, ის რაც დღეს და ბოლო დღეებში ხდება, საქმეს არ წაადგება და აღნიშნული პროცესი არ უნდა მიმდინარეობდეს ასეთი პროტესტის ფონზე.

"ამ ჩვენ ყოველდღიურ მცდელობებს, რომ აღნიშნული იშვიათი დაავადების ირგვლივ რა პრობლემებიც არის შექმნილი და რასაც ვცდილობთ გამოვასწოროთ ამ პრობლემის მიმართ მიდგომა და ყველა ის პროცესი, რაც დაწყებული გვაქვს ამ ფორმატში, ამ ხმაურის ფონზე, ამ დაძაბულობის ფონზე, მერწმუნეთ ძალიან რთულია რომ პროცესი გაგრძელდეს. ასევე მხარეები ძალიან ხშირად აღნიშნავენ იმას, რომ ეს პროცესი არ უნდა მიმდინარეობდეს ასეთი პროტესტის ფონზე და სამინისტრო და დაინტერესებული მხარეები უნდა იყვნენ კონსტრუქციულ ფორმატში, მაგიდასთან, საჭიროების შემთხვევაში, აქედან გამომდინარე მე მინდა მშობლებს ვთხოვო კიდევ ერთხელ და მოვუწოდო, გავაგრძელოთ შეთანხმებები და ყველა ის პროცესი, რაც აუცილებელია ამ იშვიათი დაავადებების მკურნალობის და მეთოდების ქვეყანაში დასანერგად, გავაგრძელოთ სამინისტროში, სამუშაო მაგიდასთან ყველა იმ ფორმატში, რომელი ფორმატების მეშვეობითაც ჩვენ ვცდილობთ, რომ ამ იშვიათ დაავადებას მივხედოთ და პრობლემები მოვაგვაროთ

ის რაც დღეს და გასული დღეების განმავლობაში ხდება, თვითონაც ხედავენ, რომ არანაირად არ წაადგება ამ საქმეს და გაცილებით უკეთესია ჩვენთან ერთად სამუშაო ჯგუფის ფორმატში, როგორც მომწოდებელთან, ასევე სხვადასხვა ქვეყნების უცხოური გამოცდილება ერთად გავიაროთ და ასევე, თუ საჭიროება მოითხოვს ექიმების გადამზადების ფორმატში განიხილონ ჩვენთან ერთად ყველა ის პროცესი, რაც საჭიროა მედიკამენტის თუ ამ იშვიათი დაავადების მკურნალობის მეთოდების დასანერგად.

ჯანდაცვის სამინისტრო ყოველთვის მზადაა, რომ იყოს მაქსიმალურად გახსნილი და ნებისმიერ მხარეს ყოველთვის აქვს შესაძლებლობა, რომ ჩაერთოს ამ ფორმატის სამუშაო ჯგუფებში - ჩვენი კარი ღიაა",- განაცხადა აზარაშვილმა.

მისივე თქმით, სამინისტორს არასოდეს, არავისთვის უთქვამს უარი აქონდროპლაზის მკურნალობაზე და მედიკამენტ „ვოსორიტიდის“ დაფინანსების საკითხთან დაკავშირებით ბიუჯეტთან მიმართებით არანაირი პრობლემა არ არის.

„არასოდეს გაკეთებულა აქცენტი იმაზე, რომ ბიუჯეტში არის, ან პირიქით, არ არის თანხა აქონდროპლაზიის მედიკამენტის დასაფინანსებლად. არასოდეს დაფიქსირებულა, რომ ბიუჯეტთან დაკავშირებით რაიმე პრობლემაა და ამას კიდევ ერთხელ ვადასტურებ“,- დასძინა აზარაშვილმა.

შეგახსენებთ, აქონდროპლაზიის სინდრომის მქონე ბავშვების მშობლები, დაახლოებით, ორი კვირაა, რაც მთავრობის ადმინისტრაციასთან აქციებს მართავენ და ქვეყანაში მედიკამენტ "ვოზორიტიდის" შემოტანას ითხოვენ. დედები პრემიერ-მინისტრ ირაკლი ღარიბაშვილთან შეხვედრასაც ცდილობდნენ, მაგრამ აუდიენცია არ შემდგარა.

24 აპრილს, ირაკლი ღარიბაშვილი მთავრობის სხდომაზე მშობლებს გამოეხმაურა და აღნიშნა, რომ "როგორც კი რამდენიმე ქვეყანა დაიწყებს გაიდლაინით მკურნალობას", საქართველო პროგრამაში ჩაერთვება. მთავრობის მეთაურის თქმით, მედიკამენტის შემოტანაზე "ცოტა მოცდაა საჭირო".

აღსანიშნავია, რომ დედებთან შეხვედრა გამართა საქართველოს პრეზიდენტმა, სალომე ზურაბიშვილმა. ზურაბიშვილი აღნიშნულის შემდეგ, ჯანდაცვის მინისტრს, ზურაბ აზარაშვილსაც შეხვდა და აქონდროპლაზიის დიაგნოზის მქონე ბავშვების მკურნალობის საკითხზე სამინისტროს სამოქმედო გეგმების შესახებ ინფორმაცია მოისმინა.

მშობლების აქციაზე რამდენჯერმე მივიდა სახალხო დამცველიც. ლევან იოსელიანმა თქვა, რომ ომბუდსმენის აპარატი, ჯანდაცვის სამინისტროსთან ერთად, პროცესში აქტიურადაა ჩართული და აქციის მონიტორინგს ახორციელებს.

უფრო ადრე, დედებთან შეხვედრა გამართა თვითონ ზურაბ აზარაშვილმა, რომელმაც თქვა, რომ "თუ ევროკავშირის წევრი რამდენიმე ქვეყანა, აიღებს პასუხისმგებლობას და სახელმწიფო ბიუჯეტიდან დააფინანსებს აქონდროპლაზიის ახლად შექმნილ სამკურნალო მედიკამენტს, საქართველო იქნება მსოფლიოში ერთ-ერთი მოწინავე ქვეყანა, რომელიც ამ პასუხისმგებლობას გაიზიარებს და წამლის შესყიდვისთვის საჭირო პროცედურებს განახორციელებს".