უკრაინის პრეზიდენტი ვოლოდიმირ ზელენსკი ხერსონის რეგიონში, სტიქიის ზონაში ჩავიდა. აღნიშნულის შესახებ ინფორმაციას ვოლოდიმირ ზელენსკი Telegram-ზე ავრცელებს.

ზელენსკის თქმით, ხერსონში მოინახულა გადასასვლელი, სადაც დატბორილი ტერიტორიებიდან ხალხის ევაკუაცია მიმდინარეობს.

"ხერსონში მე მოვინახულე გადასასვლელი, სადაც მიმდინარეობს ხალხის ევაკუაცია დატბორილი ტერიტორიებიდან. ჩვენი ამოცანაა, დავიცვათ სიცოცხლე და შეძლებისდაგვარად დავეხმაროთ ადამიანებს. მადლობას ვუხდი მაშველებს და მოხალისეებს! მადლობას ვუხდი ყველას, ვინც მონაწილეობს ამ საქმეში!"- წერს ზელენსკი.

აღსანიშნავია, რომ ზელენსკიმ ხერსონში, კახოვკას ჰიდროელექტროსადგურის აფეთქების შედეგების აღმოსაფხვრელად, საკოორდინაციო შეხვედრაც გამართა.

"სამუშაო ვიზიტი ხერსონის ოლქში. საკოორდინაციო შეხვედრა კახოვკის ჰესის კაშხლის აფეთქების შედეგების ლიკვიდაციის თემაზე. ბევრი მნიშვნელოვანი საკითხი განვიხილეთ: სტიქიის შედეგად ოლქში არსებული ოპერატიული მდგომარეობა, პოტენციური წყალდიდობის ზონებიდან მოსახლეობის ევაკუაცია, კაშხლის აფეთქებით გამოწვეული შედეგების ლიკვიდაცია, ასევე, ოლქის ეკოსისტემის აღდგენის პერსპექტივები და ოპერატიული სამხედრო მდგომარეობა ადამიანის ქმედებით გამოწვეული კატასტროფის ზონაში. მნიშვნელოვანია, ზარალის დათვლა და თანხების გამოყოფა სტიქიის შედეგად დაზარალებული მცხოვრებლების კომპენსაციისთვის",- დასძინა ზელენსკიმ.

ცნობისთვის, უკრაინის შეიარაღებული ძალების სამხრეთის ოპერატიულმა სარდლობამ 6 ივნისს გაავრცელა ინფორმაცია, რომლის მიხედვითაც, რუსმა ოკუპანტებმა, ადგილობრივი დროით 02:50 საათზე, კახოვკის ჰიდროელექტროსადგური ააფეთქეს.

მომხდარის შედეგად, ხერსონის ოლქის მარჯვენა სანაპიროზე, კრიტიკულ ზონაში, ათასობით ადამიანი აღმოჩნდა. რაც შეეხება რუსების მიერ დროებით ოკუპირებულ მარცხენა სანაპიროს, რელიეფის სიდაბლის გამო, ის კიდევ უფრო დიდი რისკის წინაშე დგას. დასახლებული პუნქტების დატბორვის საფრთხის გამო, შინაგან საქმეთა სამინისტრომ მალევე დაიწყო მოსახლეობის ევაკუაცია, რომელიც ამ დრომდე მიმდინარეობს.

აფეთქებიდან პირველ საათებში წყალმა მთლიანად ან ნაწილობრივ დატბორა 8 დასახლება და ხერსონის ერთი მიკრორაიონი მარჯვენა სანაპიროზე. ჰიდროელექტროსადგურის ნგრევის გამო, მდინარე დნეპრი, სულ მცირე, 150 ტონა ძრავის ზეთით დაბინძურდა.  

უკრაინის მთავარმა ჰიდროენერგო კომპანია Ukrhydroenergo-მა გუშინვე განაცხადა, რომ ჰიდროელექტროსადგური, სამანქანე განყოფილების აფეთქების გამო, მთლიანად დანგრეულია და აღდგენას არ ექვემდებარება. 

აღსანიშნავია, რომ კახოვკის ჰიდროელექტროსადგური სამხრეთ უკრაინას ელექტროენერგიითა და სუფთა წყლით ამარაგებდა. აღნიშნული სადგური ასევე მნიშვნელოვანი იყო ზაპოროჟიეს ატომური ელექტროსადგურის მუშაობისთვის, რადგან მისი გაგრილების აუზების სიმძლავრე დამოკიდებულია დნეპრში წყლის დონეზე.

რაც შეეხება აფეთქებაში რუსეთის მონაწილეობას, კრემლმა მომხდარს "დაგეგმილი დივერსიის შედეგი" უწოდა, მასში რუსი ჯარისკაცების მონაწილეობა უარყო და "დივერსიის ავტორად" უკრაინა დაასახელა.