ქვემო ნატანების საჯარო სკოლაში ჭერი ჩამოინგრა, რომელიც დამლაგებლს და ერთ მშობელს დაეცა - ამის შესახებ ინფორმაციას "ერთიანი ნაციონალური მოძრაობის" პოლიტიკური საბჭოს თავმჯდომარის მოადგილე, თათია ნიკოლაშვილი სოციალურ ქსელში ავრცელებს.

ნიკოლაშვილის თქმით, დაშავებულები სასწრაფო დახმარების მანქანამ საავადმყოფოში საკმაოდ მძიმე მდგომარეობით გადაიყვანა.

"ნატანების საჯარო სკოლაში ჭერი ჩამოინგრა, დაეცა დამლაგებლს, რომელიც სასწრაფო დახმარების მანქანამ გადაიყვანა საკმაოდ მძიმე მდგომარეობით და კიდევ ერთ მშობელს. ამ დროს სასწავლო პროცესი მიმდინარეობდა და აქ ორი სოფლის ბავშვები დადიან. 

ავთანდილ თალაკვაძე, სიცოცხლის და ჯანმრთელობის საფრთხის ქვეშ რომ გყავთ ბავშვები თქვენს მუნიციპალიტეტში, რა გერეკლამებათ? რა გემანქანებათ და საერთოდ ამხელა პასუხისმგებლობას როგორ იღებთ საკუთარ თავზე ?! თქვენი მაჟორიტარი დეპუტატი ცოცხალია საერთოდ", - წერს სოციალურ ქსელში თათია ნიკოლაშვილი.