ერთ-ერთი რუსული რაკეტა პოლონეთის საზღვრიდან 15 კილომეტრში ჩამოვარდა, - ამის შესახებ პოლონეთის პრემიერ-მინისტრი დონალდ ტუსკი სოციალურ ქსელ X-ზე (ყოფილ Twitter-ზე) წერს.

ტუსკი ასევე გამოეხმაურა წინა პრემიერ-მინისტრის, მატეუშ მორავეცკის უნგრეთში გამართულ კონსერვატიული პოლიტიკური მოქმედების კონფერენციაში მონაწილეობას და აღნიშნული ფაქტი შეაფასა, როგორც ანტიევროპული სტრატეგიის ჩამოყალიბება.

"დღეს ლვოვის რაიონში ათობით ბომბი და რაკეტა ჩამოვარდა. ერთი მათგანი ჩვენი საზღვრიდან 15 კილომეტრში. ამ დროს მორავეცკი ბუდაპეშტში პუტინის მომხრე ულტრამემარჯვენე პოლიტიკოსებთან აყალიბებს საერთო ანტიევროპულ სტრატეგიას. სისულელე? ღალატი? ან ორივე?", - წერს ტუსკი.