"ნაციონალური მოძრაობის" სტილია ინტიმური ცხოვრების ამსახველი ფარული ჩანაწერები, რომლებიც როგორც ჩანს, გამოიყენებოდა შანტაჟისთვის - ეს არის ზუსტად "ნაციონალური მოძრაობის" ხელწერა, რომელიც მათ 2012 წლამდე ჰქონდათ,- ამის შესახებ პარლამენტის თავმჯდომარემ, შალვა პაპუაშვილმა განაცხადა.

როგორც პაპუაშვილმა ჟურნალისტებს უთხრა, "ვინაიდან ახლა ხელისუფლებაში არ არიან, თავიანთი საცეცებით კერძო ინიციატივით აგროვებენ ასეთ ფაილებს".

"მნიშვნელოვანია ამ მხრივ, რომ შინაგან საქმეთა სამინისტრომ შეისწავლოს, ვინ დგას ამის უკან დამკვეთების სახით, ვინაიდან ეს, რა თქმა უნდა, არ არის კერძო, ერთი ადამიანის თავში დაბადებული იდეა, რომ შეეგროვებინა ფარულად სხვისი ინტიმური ცხოვრების ამსახველი კადრები, არამედ აქ დგას ცალსახად რაღაც მიზანი, რომელიც სპეცსამსახურების სტილშია იმისთვის, რომ აშანტაჟონ ადამიანები.

ითქვა კიდევაც, რომ როგორც ჩანს, საზოგადოებისთვის ცნობადი სახეებიც არიან ამ შანტაჟის ობიექტები. აქედან გამომდინარე, მნიშვნელოვანია, ყველა დეტალი ამ დანაშაულის იქნეს გარკვეული. განსაკუთრებით ამაზრზენი სახით არის, მათ შორის, ეს დანაშაული ჩადენილი. როგორც ჩანს, ხდებოდა შეტყუება ადამიანების და შემდეგ მათი ფარული ჩაწერა. ჩვენ ვხედავთ, რომ ბრალდებულები იყენებენ დუმილის უფლებას და როგორც ჩანს, ესეც აჩვენებს, რომ არ აქვთ სამართლებრივი ბევრი რამ. ასევე, შინაგან საქმეთა სამინისტრომ თქვა, რომ მათ შორის, ერთ-ერთის მონაწილეობით არის ჩაწერილი ეს კადრები, ამ ადამიანის მეუღლის მონაწილეობით, რაც კიდევ ერთხელ ხაზს უსვამს ამ დანაშაულის ამაზრზენობას. აქ ახლა რა შეთითხვნაზე უნდა იყოს საუბარი, როდესაც თავად ბრალდებულები მონაწილეობენ ამ ვიდეოფაილებში.

კიდევ ერთი საკითხია მნიშვნელოვანი - ჩვენ ვნახეთ დაკავების დროს, სპონტანურად როგორ დაორგანიზდნენ ის ადამიანები, რომლებიც არიან დღეს ე.წ. სამოქალაქო აქტივიზმის ლიდერები და თავად უჩა აბაშიძეც გამოცხადებული ჰყავდათ, როგორც ამ სამოქალაქო საზოგადოების პროტესტის ერთ-ერთი ლიდერი. ვნახეთ, რომ ისინი ცდილობდნენ, ხელი შეეშალათ პოლიციისთვის მის დაკავებაში. როგორც ჩანს, გარკვეული კავშირები არსებობს და როგორც ჩანს, გარკვეულმა პირებმა იცოდნენ, რასთან ჰქონდათ საქმე და რა დანაშაული იქნებოდა გამომჟღავნებული, ამიტომაც იყო ასეთი არაადეკვატური რეაქცია და სწრაფი ორგანიზება ადამიანების დიდი რაოდენობისა, რომ ხელი შეეშალათ პოლიციისთვის. ბევრი გამომსარჩლებელი ჰყავდა და გასაკვირი არის, რომ დღემდე ჰყავს ამ ადამიანს მაშინ, როდესაც გაირკვა, რომ სპეცსამსახურების მეთოდით შანტაჟის მიზნით აგროვებდა ადამიანებზე კომპრომატებს“,- თქვა პაპუაშვილმა.

შეგახსენებთ, ბლოგერ უჩა აბაშიძესა და მის მეუღლეს, მარიამ იაშვილს პირადი ცხოვრების საიდუმლოს უკანონოდ მოპოვებასა და შენახვას ედავებიან. აბაშიძე 9 მაისს, იაშვილი კი, 11 მაისს დააკავეს. ორივე პირს ბრალდება საქართველოს სისხლის სამართლის კოდექსის 157¹-ე მუხლის პირველი ნაწილით (პირადი ცხოვრების საიდუმლოს ხელყოფა) წარედგინა, აბაშიძეს კი, ასევე 236-ე მუხლის მესამე ნაწილით (საბრძოლო მასალის მართლსაწინააღმდეგო შეძენა-შენახვა).