სომხეთის პრემიერ-მინისტრმა, ნიკოლ ფაშინიანმა განაცხადა, რომ არ აპირებს ბელარუსში ჩასვლას იქამდე, სანამ ამ ქვეყნის პრეზიდენტი ალექსანდრე ლუკაშენკოა. აღნიშნულ ინფორმაციას "ეხო კავკაზა" ავრცელებს.

ფაშინიანი მიღებული გადაწყვეტილების მიზეზად ლუკაშენკოს მიერ, ყარაბაღის ომში აზერბაიჯანის მხარდაჭერას ასახელებს.

"ОДКБ-ს ("კოლექტიური უსაფრთხოების ხელშეკრულების ორგანიზაცია") ერთ-ერთი წევრი აცხადებს, რომ მონაწილეობდა 44-დღიანი ომის მომზადებაში (ყარაბაღში), ამხნევებდა, სჯეროდა და სურდა აზერბაიჯანის გამარჯვება. და ამის შემდეგ ბელარუსის პრეზიდენტთან ОДКБ-ს ფორმატში უნდა განვიხილო რაღაც საკითხები?“ - განაცხადა ფაშინიანმა პარლამენტში სიტყვით გამოსვლისას და პირობა დადო, რომ ამიერიდან ბელარუსს "არც ერთი ოფიციალური წარმომადგენელი აღარ ეწვევა".

ფაშინიანმა ასევე ხაზგასმით აღნიშნა, რომ გადაწყვეტილება შეიძლება შეიცვალოს, თუ ალექსანდრე ლუკაშენკო "ბოდიშს მოიხდის და ბელარუსი "კოლექტიური უსაფრთხოების ხელშეკრულების ორგანიზაციას" დატოვებს".