ისრაელის შეტევა იემენში ჩვენი მტრებისთვის ცხადყოფს, რომ არ არსებობს ადგილი, რომელსაც ისრაელის გრძელი ხელი ვერ მისწვდება,- ამის შესახებ ისრაელის პრემიერ-მინისტრმა, ბენიამინ ნეთანიაჰუმ განაცხადა.

ნეთანიაჰუმ ისრაელის თავდაცვის ძალებს "ზუსტი და წარმატებული ოპერაციისთვის" მადლობა გადაუხადა.

"მე მაქვს გზავნილი ისრაელის მტრებისთვის - ნუ შეცდებით ჩვენთან დაკავშირებით, ჩვენ დავიცავთ თავს ყველანაირად, ყველა ფრონტზე. ვინც ჩვენ ზიანს მოგვაყენებს, ძალიან მძიმე ფასს გადაიხდის აგრესიისთვის",- განაცხადა ისრაელის პრემიერმა.

მანვე საერთაშორისო თანამეგობრობას მოუწოდა, "ირანისა და მისი მარიონეტების" წინააღმდეგ ზომები გააძლიეროს.

"ვისაც სურს, იხილოს სტაბილური და უსაფრთხო ახლო აღმოსავლეთი, უნდა დადგეს ირანის ბოროტების ღერძის წინააღმდეგ და მხარი დაუჭიროს ისრაელის ბრძოლას ირანისა და მისი მარიონეტების წინააღმდეგ - იემენში, ღაზაში, ლიბანში, ყველგან",- აღნიშნა ბენიამინ ნეთანიაჰუმ.

ცნობისთვის, გუშინ, 20 ივლისს ისრაელმა, თელ-ავივზე თავდასხმის საპასუხოდ, იემენში, შიიტი "ჰუსიტების" მიერ კონტროლირებად საპორტო ქალაქ ჰოდეიდაზე იერიში მიიტანა.