უკრაინაში მებრძოლი "ქართული ლეგიონის" მეთაურმა, მამუკა მამულაშვილმა The Insider-ს განუცხადა, რომ საქართველოში ლეგიონის 300-მდე წევრი იძებნება.

მამულაშვილის თქმით, მათი უმეტესობა ახლა უკრაინაშია.

“მე ვიწინასწარმეტყველე მოვლენების ასეთი განვითარება, (უკრაინის მხარეზე მებრძოლი საქართველოს მოქალაქეების სისხლისსამართლებრივი დევნა) მას შემდეგ, რაც რუსეთმა ჩვენზე (“ქართული ლეგიონის“ მებრძოლებზე) ძებნა გამოაცხადა.

ეს იმისთვის გაკეთდა, რომ საქართველოს ხელისუფლებას ჩვენი დაპატიმრების საფუძველი ჰქონოდა. რუსული და ქართული სპეცსამსახურები დღეს სინქრონულად მუშაობენ. ბევრ ჩვენს ბიჭს, ვინც საქართველოში ბრუნდებოდა, ქართულმა სპეცსამსახურებმა ურჩიეს, წასულიყვნენ. მათ უთხრეს: “აქ ბევრი რუსი არის, ჩვენ ვეღარ დაგიცავთ, გთხოვთ, წახვიდეთ”.

არ გამოვრიცხავ, რომ მოხალისეების ნაწილი რუსეთში იყოს ექსტრადირებული, მაგრამ მხოლოდ შემოდგომის არჩევნების შემდეგ. ქართველ მებრძოლების წინაშე მოახლოებული საფრთხის შესახებ ინფორმაცია გავავრცელე აშშ-ში.

დარწმუნებული ვარ, იქნება სანქციები საქართველოს ხელისუფლების წინააღმდეგ. ჩვენ ეტაპობრივად გავამყარებთ სანქციებს ყველა იმ პირის მიმართ, ვინც ამაში მონაწილეობდა“,- აღნიშნა მამულაშვილმა, რომლის თქმითაც, ნადიმ ხმალაძეს და ლაშა ჭიღლაძეს - პირებს, რომლებიც საქართველოს სახელმწიფო უსაფრთხოების სამსახურმა დაკითხვაზე დაიბარა, არ იცნობს.

შეგახსენებთ, საქართველოს სახელმწიფო უსაფრთხოების სამსახურში აცხადებენ, რომ ტერორისტული აქტის მომზადების და სახელმწიფო ხელისუფლების დასამხობად შეთქმულების ფაქტზე გამოძიება მიმდინარეობს.