მოლდოვამ რუსეთის საელჩოს ერთ-ერთი თანამშრომელი პერსონა ნონ გრატად გამოაცხადა და ქვეყნიდან გააძევა. ამის შესახებ მოლდოვის საგარეო საქმეთა სამინისტრო განცხადებას ავრცელებს.

როგორც უწყების განცხადებაშია აღნიშნული, გადაწყვეტილების შესახებ საგარეო საქმეთა სამინისტრომ უწყებაში დაბარებულ რუსეთის ელჩს, ოლეგ ვასნეცოვს აცნობა.

სამინისტროს ინფორმაციით, გაძევების გადაწყვეტილება მას შემდეგ მიიღეს, რაც კონკრეტული მტკიცებულებები და ინფორმაცია შეგროვდა იმის თაობაზე, რომ რუსი დიპლომატი მოლდოვის ტერიტორიაზე დიპლომატიურ სტატუსთან შეუთავსებელ საქმიანობას ახორციელებდა.