საფრანგეთში ათასობით ადამიანი საფრანგეთის პრეზიდენტის, ემანუელ მაკრონის მიერ მიშელ ბარნიეს პრემიერ-მინისტრად დანიშვნას აპროტესტებს. ამის შესახებ ინფორმაციას Reuters-ი ავრცელებს.

მედიის ცნობით, მას შემდეგ, რაც მაკრონმა უარი განაცხადა “ახალი სახალხო ფრონტის“ ალიანსის კანდიდატის დანიშვნაზე, რომელიც ივლისში ჩატარებულ არჩევნებში ლიდერობდა, მემარცხენეები მაკრონს დემოკრატიის უარყოფასა და არჩევნების მოპარვაში ადანაშაულებენ.

ულტრამემარცხენე პარტიამ განაცხადა, რომ ქვეყნის მასშტაბით 130 საპროტესტო აქციაა დაგეგმილი.

კომპანია Elabe-ის მიერ გამოქვეყნებული კვლევის თანახმად, ფრანგების 74% მიიჩნევს, რომ მაკრონმა უგულებელყო არჩევნების შედეგები, ხოლო 55% თვლის, რომ მან მოიპარა არჩევნები.

მთავრობის მეთაურის რანგში პირველ ინტერვიუში, ბარნიემ განაცხადა, რომ მის მთავრობაში, რომელსაც მკაფიო უმრავლესობა არ გააჩნია, შევლენ კონსერვატორები, მაკრონის პარტიის წევრები და, იმედოვნებს, რომ მემარცხენეებიც.