თურქი პოლიტიკური და საზოგადო მოღვაწე, სასულიერო პირი ფეთჰულაჰ გიულენი 83 წლის ასაკში გარდაიცვალა. ამის შესახებ ინფორმაციას Reuters-ი გიულენთან დაკავშირებული ვებგვერდ Herkul-ზე დაყრდნობით ავრცელებს.

როგორც Herkul-მა სოციალურ ქსელ X-ზე დაწერა, გიულენი 20 ოქტომბრის საღამოს, ამერიკის შეერთებულ შტატებში, პენსილვანიის კლინიკაში გარდაიცვალა.

თურქი პოლიტიკური მოღვაწის გარდაცვალების შესახებ ინფორმაცია მისმა ძმისშვილმა, ებუსემე გიულენმაც დაადასტურა.

ცნობისთვის, თურქი მოღვაწე ფეთჰულაჰ გიულენი 1941 წელს აღმოსავლეთ თურქეთის პროვინციის ერზრუმის სოფელში დაიბადა. 1959 წელს ის ჩრდილო-დასავლეთის ქალაქ ედირნეში მეჩეთის იმამად დაინიშნა.

2013 წლამდე ქვეყნის პრეზიდენტ რეჯეფ თაიფ ერდოღანის მოკავშირე იყო, თუმცა 2016 წელს ერდოღანმა გიულენის მომხრეები სახელმწიფოს წინააღმდეგ შეთქმულებაში საჯაროდ დაადანაშაულა, თავად გიულენს კი, გადატრიალების მცდელობის ორგანიზებაში დასდო ბრალი. 

თურქი მოღვაწე ბრალდებებს უარყოფდა, თურქეთი კი, მის ექსტრადაციას ამერიკის შეერთებულ შტატებს დაჟინებით სთხოვდა, თუმცა 1999 წლიდან აშშ-ში, ემიგრაციაში მყოფი გიულენი დღემდე პენსილვანიაში ცხოვრობდა.