საქართველოს პრეზიდენტი სალომე ზურაბიშვილი საარჩევნო ელექტრონული ტექნოლოგიების დისკრედიტაციას ეწევა,- ამის შესახებ ნათქვამია განცხადებაში, რომელსაც საქართველოს საარჩევნო ადმინისტრაცია ავრცელებს.

როგორც ადმინისტრაციის განცხადებაშია აღნიშნული, "უკვე რამდენიმე დღეა, რაც პრეზიდენტი საჯარო გამოსვლებსა თუ სხვადასხვა ადგილობრივი და საერთაშორისო მედიისთვის მიცემულ ინტერვიუებში, უსაფუძვლო, არაარგუმენტირებული და ცრუ ბრალდებებით საზოგადოებაში ტექნოლოგიების მიმართ უნდობლობას აღვივებს“.

"პრეზიდენტი საერთაშორისო დონეზე ცდილობს საარჩევნო ადმინისტრაციის დისკრედიტაციას, რომელმაც უმნიშვნელოვანეს არჩევნებს გაუწია ორგანიზება უმაღლეს დონეზე. ის, რომ არჩევნები კვალიფიციურად და პროფესიულად იყო ადმინისტრირებული, დაადასტურა ეუთო/ოდირის და სხვა საერთაშორისო ორგანიზაციების სადამკვირვებლო მისიებმა თავიანთ განცხადებებსა თუ შეფასებებში. თუმცა, პრეზიდენტი ცდილობს, ვითარება სხვაგვარად წარმოაჩინოს.

სალომე ზურაბიშვილი საზოგადოებას არწმუნებს, რომ არჩევნები "ტოტალურად გაყალბდა" და ამისთვის ისეთ წარმოუდგენელ ბრალდებებს აჟღერებს, როგორიცაა მაგალითად, ის, რომ ერთი პირადობით ხმის მიცემა რამდენჯერმე ხდებოდა.

"არჩევნების გასაყალბებლად გამოიყენებოდა "სომხური კარუსელი" - ერთი პირადობის მოწმობით ხმის მიცემა, დაახლოებით, 17-ჯერ იყო შესაძლებელი“, - განაცხადა პრეზიდენტმა Associated Press-თან და CNN-თან ინტერვიუში.

სინამდვილეში ამერიკული კომპანია PRO V&V-ს დასკვნა ადასტურებს, რომ იმ ელექტრონული ტექნოლოგიებით, რომელიც 26 ოქტომბრის არჩევნებზე იყო გამოყენებული, შეუძლებელია ამომრჩეველთა სიაში ამომრჩევლის დუბლირება და ერთი ამომრჩეველი მხოლოდ ერთხელაა სიაში შეყვანილი. შესაბამისად, შეუძლებელია ერთი პირადობით რამდენჯერმე ხმის მიცემა, ორმაგი ვერიფიკაცია და ის, რომ ერთი ამომრჩეველი რამდენიმე უბანზე იყოს რეგისტრირებული.

მიუხედავად იმისა, რომ ამის მტკიცებულება არ არსებობს, პრეზიდენტი ირწმუნება, რომ "ტექნოლოგია გამოყენებულ იქნა იმისთვის, რომ გაეთეთრებინა გაყალბება". და როგორც თავად ამბობს, ამის შესახებ ინტენსიურად საუბრობს საერთაშორისო მედიასთან და სხვადასხვა ქვეყნების პირველ პირებთან.

საზოგადოებას შევახსენებთ, რომ საარჩევნო პროცესში ტექნოლოგიების დანერგვა კომპანია "სმარტმატიკთან" პარტნიორობით განხორციელდა, რომელსაც არჩევნების მოდერნიზების გამოცდილება 30-ზე მეტ ქვეყანაში. მათ შორის, დღეის მდგომარეობით, ხსენებული კომპანია ახორციელებს აშშ-ის ერთ-ერთი ყველაზე დიდი საარჩევნო ოლქის, კანადის ზოგიერთი პროვინციის, ბელგიის, ესტონეთის, არგენტინის, ავსტრალიის, ალბანეთის, ბულგარეთის, სომხეთის და ა.შ. ტექნოლოგიურ მხარდაჭერას. 

საარჩევნო ადმინისტრაცია კატეგორიულად აცხადებს, რომ საარჩევნო ტექნოლოგიებმა 26 ოქტომბერს იმუშავა გამართულად და ეს ნახა ყველა იმ საერთაშორისო, ადგილობრივი სადამკვირვებლო ორგანიზაციების, საარჩევნო სუბიექტების და მედიის წარმომადგენლებმა, რომლებიც აკვირდებოდნენ პროცესს.

ამ ყველაფრის ფონზე ელექტრონული ტექნოლოგიების დისკრედიტაციის მცდელობა სხვა არაფერია, თუ არა რეალობის უარყოფა და პოლიტიკური ინტერესებიდან გამომდინარე, საზოგადოების შეცდომაში შეყვანის მცდელობა",- აღნიშნულია განცხადებაში.