თბილისის რამდენიმე სკოლის გაფიცული მოსწავლეები საპროტესტო აქციებს მართავენ.

მოსწავლეები პროტესტის ნიშნად გაკვეთილებზე დასწრებას არ აპირებენ.

გაფიცული მოსწავლეების აქცია თბილისის 161-ე საჯარო სკოლის, მე-6 გერმანული გიმნაზიის, თბილისის 171-ე სკოლისა და დიღმის 192-ე საჯარო სკოლის მიმდებარე ტერიტორიაზე მიმდინარეობს.

„მოსწავლეების ერთიანობა არის ახლა ყველაზე მნიშვნელოვანი. მნიშვნელოვანია, რომ ვიყოთ ერთად და დავდგეთ ერთად. გვართმევენ საქართველოს, საჭიროა გავერთიანდეთ. ჩვენი გზა და ადგილი არის ევროპაში და აუცილებლად წავალთ ევროპაში. არ უნდა ვიყოთ უმოქმედოთ“,- უთხრა 161-ე სკოლის მოსწავლემ „მთავარ არხს“.

სკოლის გაფიცულმა მოსწავლეებმა აქცია გამართეს მუხიანის 174-ე, 175-ე და 181-ე საჯარო სკოლის მიმდებარე ტერიტორიაზეც.

„ჩვენ გვინდა დამოუკიდებელი საქართველო,  ევროპა და გვინდა ჩვენს სიტყვას ქონდეს აზრი. ჩვენი სურვილია, სკოლა ჩვენს მხარეს გადმოვიდეს და იყოს რუსეთის წინააღმდეგ, როგორც საქართველო და ევროპა ერთ მხარეს ვიდგეთ“,- უთხრა 181-ე სკოლის მოსწავლემ „მთავარ არხს“.

ასევე, ზუგდიდში სკოლის გაფიცულმა მოსწავლეებმა საპროტესტო მსვლელობა გამართეს.

„დღეს ჩვენ გაფიცულები ვართ და სკოლებში არ ვესწრებით საგაკვეთილო პროცესებს. ჩვენი მთავარი მიზანი არის ახალი არჩევნები, მშვიდობა და ევროინტეგრაციის საკითხების აღდგენა“,- განუცხადა ზუგდიდის პირველი სკოლის მოსწავლემ „მთავარ არხს“

გარდა ამისა, ქუთაისში 36-ე სკოლის მოსწავლეები სკოლის მიმდებარე ტერიტორიაზე აქციას მართავენ. მოსწავლეების საპროტესტო აქცია იმართება ბათუმსა და რუსთავშიც.

შეგახსენებთ, თბილისთან ერთად, არაერთი ქალაქი პროტესტმა მას შემდეგ მოიცვა, რაც 28 ნოემბერს, პრემიერ-მინისტრმა, ირაკლი კობახიძემ „ქართული ოცნების“ გადაწყვეტილება გაახმოვანა, რომლის მიხედვითაც, ევროკავშირთან მოლაპარაკებების გახსნის საკითხი 2028 წლის ბოლომდე დღის წესრიგში არ დადგება.