მიხეილ ყაველაშვილმა საგარეო მრჩევლად ლუკა ეხვაია დანიშნა - ინფორმაციას ყაველაშვილის პრესსამსახურში ადასტურებენ. 

BMG-ის ცნობით, ეხვაიას ხელფასი 6 424 ლარია. 

ლუკა ეხვაია ანტიდასავლური მემარცხენე პლატფორმის ავტორია. 

ამერიკასთან სტრატეგიული პარტნიორობის გაწყვეტას ის საჯაროდ ზეიმობდა და მას "გარე მტრად" მოიხსენიებდა.

"ნამდვილო ქართველებო, გილოცავთ, დღეს კიდევ ერთი დიდი ნაბიჯი გადავდგით დეკოლონიზაციისა და დამოუკიდებლობის გზაზე, თანამედროვე სამყაროს უდიდესმა იმპერიამ და დაღმავალმა ჰეგემონიურმა ძალამ - აშშ-მა ჩვენთან სტრატეგიული პარტნიორობის ხელშეკრულება შეაჩერა, რითაც დამოუკიდებელი საქართველოს ისტორიის ახალი ფურცელი გადაიშალა.

ყველა მხრიდან გვიტევენ, გარე თუ შიდა მტრები, მაგრამ ამ ომიდან გამარჯვებულები გამოვა ჩვენი დიადი, ღირსეული და დაუმორჩილებელი ერი!" - წერდა ეხვაია 1 დეკემბერს. 

გუშინ ირაკლი კობახიძე საზოგადოებრივ მაუწყებელთან ინტერვიუში ამბობდა, რომ ქართულ-ამერიკულ ურთიერთობებში  თანხვედრა არსებობს, მთავარია კონკრეტული ნაბიჯები გადაიდგას. 

"ეს ყველაფერი დიდწილად დამოკიდებული იქნება იმაზე, თუ რამდენად დამარცხდება საბოლოოდ "დიფ სთეითი"  აშშ-ში. პრობლემები კვლავაც არის, კვლავაც არის "დიფ სთეითის" სერიოზული გავლენა. თუ მოხერხდება "დიფ სთეითის" სრულად თუ თვისობრივად დამარცხება, ამ შემთხვევაში, მე ვფიქრობ, რომ ვერაფერი დაუდგება წინ ქართულ-ამერიკული ურთიერთობის გადატვირთვას" - თქვა კობახიძემ.