პირველ ცდაზე ქართველმა ძალოსანმა 208 კგ შეუკვეთა და იოლად დაძლია, მეორეზე – 215 კილოგრამს შეუტია. მისი აწევა ოლიმპიური რეკორდის დამყარებას ნიშნავდა. როგორც მოსალოდნელი იყო, მას არც ოლიმპიური რეკორდის დამყარება გასჭირვებია.

მესამე ცდაზე მისმა მწვრთნელმა გიორგი ასანიძემ 221 კგ შეუკვეთა. თუმცა ბოლო მომენტში 223-ად გადააკეთა. მიზეზი მარტივია – 222 კგ ლაშას მიერ დამყარებული მსოფლიოს რეკორდი იყო. მისი გაუმჯობესებისთვის კი ერთით მეტი კილოგრამი იყო საჭირო. მან 223 კილოგრამიც დაძლია.

აკვრაში ტალახაძის მწვრთნელმა გიორგი ასანიძემ პირველ ცდაზე 247 კგ შეუკვეთა. მისი დაძლევა საკმარისი აღმოჩნდებოდა ოლიმპიური ოქროს მოსაგებად.