ნაციონალური მოძრაობის ლიდერი ნიკა მელია საკუთარ Facebook-ზე სერბეთის სახელით მოასპარეზე ქართველ მოჭიდავე ზურაბ დათუნაშვილის ბრინჯაოს მედლის მოპოვებას გამოეხმაურა.

"ჩვენი ქვეყნის უკუღმართობამ, ფედერაციაში არსებულმა განუკითხაობამ იგი იძულებული გახადა სხვა ქვეყნის სახელით ეასპარეზა და მისი წარმატება მისი სამშობლოს წარმატება არ ყოფილიყო." - წერს ნიკა მელია.

ტოკიო 2020-ის ოლიმპიურ თამაშებზე, ბერძნულ-რომაული სტილით მოჭიდავეთა ტურნირის ფინალურ ბლოკში დღეს სერბეთის სახელით მოასპარეზე ქართველი ზურა დათუნაშვილი (87 კგ) ბრინჯაოს მედლის მფლობელი გახდა. მესამე ადგილისთვის ბრძოლაში მან ხორვატი ივან ჰუკლეკი ანგარიშით 6:1 დაამარცხა.