საქართველოს პრემიერ-მინისტრი ირაკლი ღარიბაშვილი მთავრობის ადმინისტრაციაში სომხეთის პრემიერ-მინისტრს, ნიკოლ ფაშინიანს მასპინძლობს. 

ოფიციალური ვიზიტით ფაშინიანი საქართველოს დღეს ეწვია და მისი ვიზიტი ორი დღე გაგრძელდება. 

მთავრობის ადმინისტრაციის ინფორმაციით, გაიმართება ორი ქვეყნის პრემიერ-მინისტრების შეხვედრა პირისპირ და გაფართოებულ ფორმატში, რის შემდეგაც, ირაკლი ღარიბაშვილი და ნიკოლ ფაშინიანი მედიისთვის ერთობლივ განცხადებებს გააკეთებენ.

სომხეთის პრემიერ-მინისტრი ვიზიტის ფარგლებში საქართველოს პრეზიდენტ სალომე ზურაბიშვილსაც შეხვდება.

ნიკოლ ფაშინიანი, დელეგაციის წევრებთან ერთად, გვირგვინით შეამკობს საქართველოს ერთიანობისთვის ბრძოლაში დაღუპულ გმირთა მემორიალს.

ნიკოლ ფაშინიანის ოფიციალური ვიზიტი ხვალ, 9 სექტემბერს დასრულდება.