აუდიტის სამსახურის ყოფილ ხელმძღვანელს, ლაშა თორდიას, ამერიკამ პოლიტიკური დევნილის სტატუსი მიანიჭა. ამის შესახებ თოდრიამ საკუთარ ფეისბუქ გვერდზე დაწერა. მისი თქმით, დევნილის სტატუსი 4-წლიანი პროცესის შემდეგ მიენიჭა.

თორდიამ საქართველო მას შემდეგ დატოვა,რაც სასამართლომ მისი ცემის ფაქტზე ყოფილი მთავარი პროკურორი, ოთარ ფარცხალაძე გაამართლა.

"ფარცხალაძეს გადაეცა მიწის ნაკვეთები, რამდენიმე მიწის ნაკვეთი მილიონის ღირებულების, რომელიც ყოველგვარი ტენდერისა და კონკურსის გარეშე განახორციელეს. ამას მოყვა, ოთარ ფარცხალაძის თავდასხმა ჩემზე, სადაც მან პირდაპირ მითხრა, რომ როგორ გავბედე და ვაგროვებდი მასზე კომპრომატებს. გამოძიებაც მათ შორის ისე წარიმართა, რომ საბოლოო გამამტყუნებელი განაჩენი არ დამდგარიყო, კერძოდ გამართლდა ოთარ ფარცხალაძე. ყველა ეს ბრძანება გათვალისწინებული იყო ამერიკული სასამართლოს მიერ, რის შედეგად მე მომენიჭა პოლიტიკური დევნილის სტატუსი, იმ პერიოდამდე სანამ შევძლებ სამართლიანობის მიღწევას"- ამბობს ლაშა თორდია „მთავარ არხთან “ ინტერვიუში.

ლაშა თორდიაზე თავდასხმის ფაქტი კი 2017 წლის 12 მაისს მოხდა, ღამის კლუბ „ელ ცენტროში“.

გამოძიება ამ საქმეზე ცემის მუხლით მიმდინარეობდა, „ადამიანის უფლებათა ცენტრი“ კი მოითხოვდა ოთარ ფარცხალაძისა და მიხეილ ჩოხელისთვის წარდგენილი ბრალის გადაკვალიფიცირებას სისხლის სამართლის კოდექსის 353-ე პრიმა მუხლით, რაც გულისხმობს სახელმწიფო ხელისუფლების წარმომადგენელზე თავდასხმას, მისი საქმიანობიდან გამომდინარე.  ამ საქმეზე ჯარიმა 5 000 ლარის ოდენობით დაეკისრა მხოლოდ ერთ პირს, ფინანსური პოლიციის ყოფილ თანამშრომელს, მიხეილ ჩოხელს.