ტოქსიკური სიცრუე, რომელიც შექმნილია ამერიკელ და ქართველ ხალხს შორის ურთიერთობის დასაზიანებლად, - ასე ეხმაურება საქართველოში ამერიკის შეერთებული შტატების ყოფილი ელჩი, იან კელი მოძრაობა "ხალხის ძალის" განცხადებას. 

კელი სოციალურ ქსელ Twitter-ზე წერს, რომ "ხალხის ძალის" განცხადებები მიზნად აშშ-ს ელჩის დისკრედიტაციასაც ისახავს.

"ტოქსიკური სიცრუე, რომელიც შექმნილია ამერიკელ და ქართველ ხალხს შორის ურთიერთობის დასაზიანებლად და აშშ-ს ელჩის დისკრედიტაციისთვის. დადგება ვინმე მთავრობიდან თავისი სტრატეგიული პარტნიორის მხარდასაჭერად და უარყოფს ამ სიცრუეს?" - წერს იან კელი.

ცნობისთვის, ანტიდასავლურმა მოძრაობა „ხალხის ძალამ“ გუშინ, 7 ნოემბერს გაავრცელა განცხადება, რომლითაც აშშ-ს საელჩო ხმების პარალელური დათვლის შედეგების გაყალბებასა და არჩევნების ხელოვნური დელეგიტიმაციის მისაღწევად, "მედიის ფეიკ-კამპანიის" დაფინანსებაშიც დაადანაშაულა. 

"ოცნებიდან" ცოტა ხნის წინ წასულებმა, გუშინ განაცხადეს, რომ "ქართულ ოცნებას"  არ ჰყოფნის გამბედაობა, ამერიკელებს დაუპირისპირდეს და ქვეყნისა და საზოგადოებისთვის მნიშვნელოვანი ნაბიჯი გადადგას".