ამ მძიმე დროს საქართველო დგას თურქი ხალხის გვერდით,- ასე ეხმაურება საქართველოს პრეზიდენტი სალომე ზურაბიშვილი თურქეთში მომხდარ დამანგრეველ მიწისძვრას.

ზურაბიშვილმა მიწისძვრის შედეგად დაღუპულთა ოჯახებს მოუსამძიმრა და შემთხვევის ადგილზე მყოფებს გამძლეობა უსურვა.

"ვგლოვობთ კარამანმარასში [თურქეთში] მომხდარი სასიკვდილო მიწისძვრის დროს ადამიანების ტრაგიკულად დაღუპვას. 

ამ მძიმე დროს საქართველო დგას თურქი ხალხის გვერდით. ვუსამძიმრებ დაღუპულთა ოჯახებს და გამძლეობას ვუსურვებ შემთხვევის ადგილზე მყოფებს",- წერს ზურაბიშვილი. 

შეგახსენებთ, თურქეთის სამხრეთ-აღმოსავლეთ ნაწილში, სირიის საზღვართან ახლოს 7.8 მაგნიტუდის სიმძლავრის მიწისძვრა მოხდა. ​აშშ-ის გეოლოგიური სამსახურის ცნობით, მიწისძვრა ადგილობრივი დროით 04:17 საათზე 17,9 კმ სიღრმეზე ქალაქ გაზიანტეპთან დაფიქსირდა.

მიწისძვრას თურქეთსა და სირიაში ასეულობით ადამიანი ემსხვერპლა.

ამ დროისთვის, დანგრეული შენობების ნანგრევებიდან ადამიანების გამოსაყვანად სამაშველო ოპერაციები მიმდინარეობს.​