ფინეთის ნატო-ში გაწევრიანება კონფლიქტის ესკალაციის რისკს ქმნის, მაგრამ გავლენას არ მოახდენს სამხედრო სპეცოპერაციის შედეგზე, - ამის შესახებ რუსეთის თავდაცვის მინისტრმა, სერგეი შოიგუმ განაცხადა.

მისივე თქმით, შექმნილი პირობებიდან გამომდინარე, რუსეთი მისი მოკავშირე ქვეყნის, ბელარუსის დასაცავად, საპასუხო ზომებს იღებს, აქედან გამომდინარე, რუსეთმა ბელარუსს გადასცა ისკანდერების საოპერაციო ტაქტიკური სისტემები, რომლითაც შესაძლებელია როგორც ჩვეულებრივი, ასევე ბირთვული რაკეტების გამოყენება.

"ნატო მთელ რიგ ნაბიჯებს დგამს, რომ გაზარდოს შეიარაღებული ძალების საბრძოლო მზადყოფნა. ინტენსიურს ხდიან საბრძოლო წვრთნას და დაზვერვით საქმიანობას რუსეთის და ბელარუსის საზღვრებთან. ფინეთის ნატო-ში გაწევრიანება კონფლიქტის ესკალაციის რისკს ქმნის, მაგრამ გავლენას არ მოახდენს სამხედრო სპეცოპერაციის შედეგზე. ასეთ პირობებში, ვიღებთ საპასუხო ზომებს ჩვენი მოკავშირე ქვეყნის დასაცავად. რამდენიმე ბელარუსულ თვითმფრინავს აქვს შესაძლებლობა, მოწინააღმდეგის სამიზნეებზე ბირთვული იარაღით მიიტანოს იერიში. გარდა ამისა, გადავეცით ისკანდერების საოპერაციო ტაქტიკური სისტემები, რომლითაც შეუძლიათ როგორც ჩვეულებრივი, ასევე ბირთვული რაკეტები გამოიყენონ", - განაცხადა შოიგუმ.

ცნობისთვის, ფინეთის საგარეო საქმეთა მინისტრმა, პეკა ჰაავისტომ ნატო-ში გაწევრიანების დოკუმენტს ხელი დღეს ოფიციალურად მოაწერა.